Chegórun

Chegórun onte i l armano de miu tio, Juan Grabiel foi alhá pa ls ber.
La cumbersa era an Sendinés antremeada ralas bezes por Francés quando ls eimigrantes, que son mius becinos solo un cachico de l anho, nun achában las palabras ciertas.
Miu abó Perç yá alhá staba i cuntaba que yá tenie setienta i seis anhos.
-Eilhes andan bien legeiros, ls de l lar. Bien apeçonados i ban a la missa bien bestidos. Tengo que you ir para alhá tamien. Brincaba el.
Cuntou el, inda ne l tiempo de padre Chico, tiu Panelas bia ir muita pessona a quemer la hóstia i dezie cuitada de la armana de l Padre que se farta de fazer sartianadas de hóstias.
Apuis Juan Gabriel cuntaba tamien las sues abinturas, que un anho passa debrebe mas siempre hai que cuntar. De ls ninos que naceran nun se falou, cumoquiera porque nun serien muitos, mas de ls que yá zarpáran, mesmo yá muortos, inda se falou deilhes.
Uii tiu Horácio, aich... Uii l outro mira aquel murriu-se de pie a falar, dou-le un ataque i quedou-se.
Berdade seia dita, tamien hai que lembra-los.
-À Manél bibes ua pinga?
I el sin fazer muito caso cuntinou a falar de cumo ancuntrou auga ne l huorto i nun era ciedo nin era tarde para abrir ua sanja. Se la auga stá a trenta metros nin que steia mais fonda spurmenta-se. Se el andou alhá cun un palo berde i albantaba-se, ye porque hai algo. Ye la angenharie antiga i puode ser que seia mais certeira que las modernices que por ende andan.
-À Manél quieres auga ó ua pinga?
Desta beç lougo respundiu: Auga bibe-la tu (la sanja yá staba un cachico abierta i yá manou ua pouca d'auga, apuis que yá le chegaba).

Tiu Manél Grabiel, home que le chaman Juan Grabiel, inda dixe que tenie feito à pouco ua sestia i inda tenie "suonHo". You cun atento a ber se acaçaba palabras que nin maginaba, quedei a pensar se el querie dezir an Pertués "sono" ó "sonho"!


Este testo stá screbido cun l- an ampeço de palabra, a la moda de l Mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.