Senhor Pursidente

Senhor pursidente,
Dius le deia buonos dies.

You bien sei que inda passou pouco tiempo zde que l senhor stube por aqueilhes lados. Mas inda assi cuido que ten que retornar, mas cun uolhos de ber.
Retorne alhá mas nun traga tanto aparato. Deixe l sou Mercédes an la garaige. Benga cun un altemoble cun ua matricula cumo la de todo mundo. Benga. De camboio nun hai un que faga l camino todo, assi bai tener que benir mesmo de altemoble. Ye bien loinge bien sei, mas faga siempre por cumprir l código de la strada. A mi la Guardia ua beç yá me ambiou un belhete pa l cinema, mas nun ls antendi que por aqueilhes lados nun hai cinema, a nun ser cun Charrau i esse ye pa quien quejir ber. Buono, nun tenga priessas porque bai a demorar un cachico buono. Mas bá, benga. Nin que tenga que ser por Spanha.

Benga pa l mei de l pobo, ye a eilhes que ls ten que oubir, ye la sue boç que debe ser oubida. Benga oubir las sues afliçones, l sou zanimo.
Puode ser que tenga oubido falar an Mirandés, mas inda assi fui un Mirandés mui alperaltado, mui ansaiado i mui cipe-çape.
L Mirandés berdadeiro stá ne l coraçon de quien nun l pensa.
Deia un cachico de atençon a esta léngua que stá a la spera de la muorte. Cula aiuda de to l mundo inda bai mei ressucitando, mas cula sue boç pa dar ua upa a la léngua podie ser que se spabilásse inda mais un cachico.

Benga passiar, mesmo a pie, nin percisa de andar ne l barco de ls spanholes sin lo saber, ó nó, i fazer de cuonta que hai ouferta pa ls turistas. Deia quatro saltos an liberdade. Aire puro ye defícele ancuntra-lo melhor an Pertual i por muito lado. Eiqui tamien nun ten que se afligir culs abiones a passar-le porriba de la cachimónia. Bai ber que puode andar tranquilo.
L transito maior que puode acaçar ye cun burros i mesmo assi yá naide se acumpara cun antigamente. Si, burros hai muitos, mas you digo ls que stan an bias de stinçon.

Stando acá puode quemer i ampeçar a angordar un cachico. La sue tie bai a gustar. Porbe de la posta, chouriços, bulhos, las tabafeias i ls folares. Yá nin falo an guendilhas, pumientos i por ende. Mesmo ua fogaça bal mais que todo l pan desses panes de forma. Todo esto acumpanhada cun ua pinga. Claro nun puode trazer cul senhor ls ASAE senó cun tanta sigurança alimentar l senhor inda passa fame. Tamien nun queremos que se ancerre to ls cantos que hai por ende senó ye que se muorre porqui, que l negócio yá nun abunda.

Baia a ber cumo las pessonas tratan de la sue huorta, de las sues binhas, cumo se fusse ua filha. Cun amor, muito trato i laborico. Cul amor que le ténen a las sues cousas bien les puode pagar que nun la abandonan. Solo la mandriaige (i quien nun puode mesmo bá, mas cuitados) ye que bai a quedar cul denheiro i se bai a fazer selombra pa debaixo de la moreira.

Benga. Beia a ber, mas cun uolhos de giente.

Culs melhores cumprimentos,
Cecílio


Este testo stá screbido cun l- an ampeço de palabra, a la moda de l Mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.